رضوى إبراهيم تكتب: وليه تتكملي معاه وإنتي مش عايزاه!!!
بقلم- رضوى ابراهيمميدانيمش هنفرح بيكى بقى؟ مالك يا بنتي تخنتي ليه كدا مش هتلاقي راجل يبصلك!ولادك مش حلوين زيك! بيتك ضيق أوي! إنتي قاعدة في مفروش ليه ! إنتي قاعدة عند حماتك إزاي وقادرة تستحملي إزاي؟ هو جوزك ليه مبيخرجيش كتير ؟مرتب جوزك كام؟ هو جوزك بيشتغل ايه؟ ياعيني عليكي هو مرتب جوزك مكفيكي إزاي؟ هو جوزك سايبك تشتغلي وتتبهدلي كدا إزاى ؟ إنتي مالك بتلبسي كدا ليه واتبهدلتي في نفسك أوي؟ دي معظم الأسئله اللي بتتسئلها البنت علي مدار حياتها و بتكون القوه المؤثرة هي المحيط الخارجي زي الخالات والجيران بيأثرو على الأم والأم بتنقل الطاقه السلبية للبنت ... لو في فرح ممكن تستلف تمن الفستان علشان بنتها تلبس وتلفت نظر الرجاله , بتملى دماغ بنتها بأفكار سلبية كتير من غير ما تقصد زى مثلاً ... انها ناقصه حته ... معيوبه لانها لسه متجوزتش لحد دلوقتي ... اه احنا في 2016 ولسه أغلب الناس كدا... البنت في الوقت ده لو اتقدم لها أسوأ راجل هتوافق عليه علشان تتجوز ... بتوافق علي الخطوبه وممكن متكونش بتحبه ... أو شكله مش عاجبها ... بس لازم توافق .. خايفه لمتتجوزش وتبور تقعد مخطوبه كتير البنت شخصيتها في الوقت ده بتتغير وممكن تعيط لو جاراتها اتجوزت قبلها.. وتتنازل عن حاجات كتير علشان تتجوز وخصوصا لو البنت مش واثقه في نفسها او مبتشتغلش فدماغها بتكون محدوده علي قد العالم الصغير اللي حواليها تتجوز باقل الامكانيات وبكامل ارادتها وهي اللي بتسرع في الجوازه وهي مش بتحب اللي هتتجوزه ولا مقتنعه بيه شكلا ولا موضوعا , وتتجوز وتبتدي رحله عدم الرضا .. لو واحده صحبتها او قريبتها اتجوزت راجل وسيم تكون متضايقه ومخنوقه وبينها وبين نفسها ( جتنا نيله في حظنا الهباب) لو واحده قالت لها انتى بيتك ضيق اوي او انتي ازاي قاعده مع حماتك ترد عليها وتقولها اصلي مستنيه بحث المحافظه فترد عليها ربنا ياختي يكرمك وهي تتخنق وتعيط علي بختها ... لو حد سالها جوزك بيشتغل ايه ممكن تتكسف تقول بيشتغل في محل او علي باب الله... وتتخنق بزياده ... تخلف عيال فالمسئوليه بتكتر والفلوس زي ماهي ... عدم الرضا عندها بيزيد... جوزها ممكن يشتغل شغلتين او تلاته علشان يكفي العيشه ..تيجي صحبتها تقولها هو انتي ليه جوزك مابيخرجكيش! تبتدي تدور علي النكد بمنكاش ... تحس ان حياتها بتتسرق عايزه تصرخ من جواها مش لاقيا نفسها .. عمرها بيضيع مع واحد مش بتحبه حتي لو كان طيب ... طيب ليه متجوزتش راجل وسيم وشغال في مركز كويس ! وأدخل عيالي مدارس خاصه ! طيب ليه متجوزتش عن قصه حب! وليه اشتغل واطفح الدم وماتستتش واقعد في احسن شقه وليه مبقاش زي فلانه وعلانه وليه انا بالذات اللي ابقي في الغلب ده ... وتقعد الست تنكد علي نفسها وبيظهر ده في صوره اكل بشراهه وتتخن وتهمل في نفسها وتبقي زيها زي اي ست عربيه مفرومه علشان تعيش وتربي العيال وهي مش راضيه ... مخنوقه ... ويجلها الضغط من كم الصراع النفسي اللي جواها ... بس هو مين اللي جاب الصراع ومين السبب انك تعيشي حياه مش عايزاها ... وايه ذنب جوزك؟ أوعي تقولي الناس ... ساعات بنكذب علشان نقدر نعيش ... السبب في تعاستنا او سعادتنا هو احنا .... خايفين من كلام الناس ... خايفين لقطر الجواز يفوتنا ...خايفين من نظرات المجتمع ... خايفين ... خايفين .. خايفين ... بس لما نقع مش هنستفيد من الناس والمجتمع غير النميمه وبس ... ولازم تعرفي ان الناس اللي بتلومك علي تاخر جوازك هماهما الناس اللي بتنتقض حياتك ... والناس اللي بتنصحك غالبا ما بيعمولش بالنصيحه اللي بيقولهالك ... بس للاسف انتي اللي سمحتلهم في التدخل في حياتك من الاول فاصبح دا العادي ... ان الناس تتدخل والناس تتنتقد وناس بتقول والناس بتعيد .... طيب ما تشتغلي وتاخدي كورسات وتعملي حاجات مفيده تحسسك بقيمتك لحد ما يجي ابن الحلال اللي تقتنعي بيه بجد اللي عقلك وقلبك يقولولك هو دا ... بلاش تظلمي راجل معاكي وتظلمي عيال بعد كدا يقعدوا في جو اسري يجيب المرض... بدل لما تعيشي دور الضحية بعد الجواز وتشتكي من ظروف جوزك سواء ماديه او طبيعة شغله او البيت الضيق او من حماتك اللي قاعده معاكي ماهو انتي برده ما تفاجأتيش من الوضع ... بس انتي ما كنش في دماغك وقتها غير انا عايزه اتجوز ... المجتمع عليه عامل بس احنا في 2016 برضه المفروض نفكر بطريقه اشمل واوسع... وتترفعي عن الهيافات وان واحده تقولك هنفرح بيكي امتي ... دي حياتك انتي مصيرك انتي ... اختاريه زي ما انتي عايزه وتحملي مسئولية اختيارك ... بدل ما تتحملي مسئولية خوفك من كلام الناس... يبقى من الاول تحطي في اعتبارك ... وليه تكملي معاه وانتي مش عايزاه... لو ملقتيش النص اللي يكملك أوعي ترضى بأي نص...