كشفت الفنانة داليا مصطفى، عن إصابتها بمرض السكري، وذلك بعد ظهورها في إحدى الصور التي نشرتها تحمل جهاز في ذراعها، كما أعلنت عبر حسابها الرسمي على 'إنستجرام'.

ونشرت داليا مصطفى مقطع فيديو عبر حسابها الرسمي بموقع 'إنستجرام'، وقالت: 'كنت منزلة صورة أنا وأختي وكنت مركبة جهاز مرض السكر في ذراعي، وبعد ما نزلتها لقيت أمهات كتير بعتولي وناس منظمة لمعارض السكر كلموني وشجعوني إني لابساه ومش مكسوفة'.

الأمهات قالولي شكرا إنك طلعتي بيه عادي بالمنظر ده

وتابعت: 'الأمهات قالولي شكرا إنك طلعتي بيه عادي بالمنظر ده، وده خلى أولادنا عندهم ثقة إنهم يلبسوه عادي، ويمكن إحنا معندناش التوعية دي، ومفيش داعي للتنمر، وعلى فكرة مش فارقة ومش مهم رأي أي حد فيا، والجهاز ده ريحني جدا وسكري قبل كدة كان صعب'.

واختتمت داليا مصطفى: 'بشجع كل الأطفال ومرضى السكر إنهم يلبسوه، وميفرقش معاهم حد وكل واحد بيبقى شايل هم شكله قدام الناس، لكن الحقيقة إن كل واحد مشغول بحاله، وفكروا في نفسكم بس'.