لم يسلم المهندس خالد عبد العزيز وزير الشباب والرياضة، من التعرض للاستغلال من قبل أحد البائعين عصر أمس الجمعة، خلال زيارته لمركز شباب الحبانية بالدرب الأحمر. وكتب عبد العزيز خلال تغريدة له عبر حسابه الشخصي على موقع التواصل الاجتماعي "فيس بوك" : "أمس الجمعة كنت فى زيارة لمركز شباب الحبانية بالدرب الأحمر وكنت أقود سيارتى وارتدى ملابس رياضية وعند مدخل شارع المركز وجدت عيش بلدى شكله حلو على الرصيف ومتغطى بالنايلون وزى أى مصرى صايم يبقى عايز يشترى أى أكل يشوفه قبل الفطار وفضلت أدور على البياع ولقيت شاب جاى من بعيد بيقول لى فى رغيف بخمسة وعشرين ورغيف بخمسين ورغيف بخمسة وسبعين قرش وطبعاً إشتريت عيش اكتر من حاجتى انا وزوجتى بكتير وبعد أمتار لقيت شاب أخر ملابسه نضيفه وشيك بيبيع طرشى على ترابيزه خشب ورغم أنى مش من آكلة الطرشي وخصوصاً الحار إشتريت وبكمية كبيرة لاننى فرحان بالشاب المكافح ولكن الغريب ان الكيس بستة جنيه مش بخمسة ولا عشرة وقبل دخول المركز لقيت رجل بيبيع خوخ وعنب فقط وباع لى كيلو الخوخ بثمانية جنيه والعنب بستة ولكنى كنت مبسوط بالحى الشعبي الجميل والخير كتير والجو الرمضاني الساحر وعرفت من شباب مركز الحبابية ان الخوخ بخمسة جنيه فقط وان البياع اشتغلنى واحنا خارجين من المركز الشباب قالوا للفكهانى ده وزير الشباب كده تفضحنا . قال لى وهو مبتسم ومش مصدق الشباب معلش يابيه الحياة غالية وكل سنة وانت طيب ورمضان كريم . أحياءنا الشعبية عريقة وعظيمة وجميلة وفيها شباب بيكافح وهذه الأحياء هى سبب عظمة واستقرار مصر" .