من ٤ سنين جيت إنجلترا سياحة و ظروف قهرية صحية طارئة إضطرتني أقعد هنا و أغير كل حياتي لعدم وجود رعاية طبية و علاجية بالمعني الحرفي للكلمة !!!
و محدش يقوللي عندنا أعظم دكاترة والبؤين دول والنبي ( من غير تفاصيل أمي اتوفت بسبب غلطة طبيب في مستشفي دار الفؤاد المشهورة من قبل ماسيب مصر بدار الوفاة و ابني و اللي حصله ده مأساة تانية لا مجال للحديث عنه هنا ) .

المهم اللي شوفته هنا خلاني أكثر إصرارا و حِدة إن ثورتنا إن شاء الله لازم تستكمل .

شوفت يعني ايه تبقي بني آدم تعيش و تحس و تتصرف كبني آدم .
علاج تعليم سكن حتي الفسحة بتوفره الدولة لمواطنيها انت ما عليك غير تشتغل لو عاوز ترفع مستوي معشيتك من فئة فقير لمتوسط الدخل لغني هو ده مجهودك بقي .

لكن في جميع المستويات انت مش بتفكر إنك لما تعيا مش هتلاقي علاج و لا بتفكر تشغل ولادك لانك مش لاقي تاكل انت وولادك و لا بتفكر إنك ممكن تبقي في الشارع من غير مأوي انت و عيلتك لان فلوس الإيجار مش متوفرة !
( بالمناسبة كل واحد من حقه سكن و من حقه يغيره بطلب من الحكومة حسب تغير حالته الإجتماعية يعني العازب له شقة و بعد الجواز تكبر و بعد ما يخلف تكبر و لو زاد عدد الأطفال تكبر و هكذا و لازم حتي في حي الفقراء يبقي فيه جنينة مجهزة للأطفال علشان تلعب )

انت محترم و لك الحق كإنسان بالقانون زيك زي أكبر راس في البلد حتي كلمة أكبر راس دي مصطلح مش موجود هنا لان اللي بيحكم أو في النظام ما هو إلا خادم للشعب اللي انتخبه !

أنا مش بأحكي في شعارات و كلام نظري فعليا ديڤيد كاميرون كان كلامه في حملته الانتخابية ؛ نحن السياسيون خدام الشعب .
We politicians are the servants of the people .

شوفت عسكري البوليس حاطط رقم علي كتفه علشان كمواطن لو داسلك علي طرف تاخد رقمه و تروح تشتكيه .

شوفت الدنيا مقلوبة علشان كام عضو برلمان خدوا فلوس مش من حقهم كاستغلال لعضويتهم في البرلمان طب كام بقي الفلوس دي ؟! اللي خد ٤٠ باوند آه والله ٤٠ صلح بيها قعدة تواليت و لا معرف ايه كبيرهم علي ما أفتكر خد ٤٠٠ باوند لاني محضرتش الواقعة نفسها لكن بقيت أشوف في التليفزيون مداولات و محاكمات في برنامج ما و عرفت منه القصة !!!!
باتريق علي واحدة إنجليزية و أقولها زعلانين علي كام باوند وشها إحمر و كأني شتمتها دي فلوس الضرايب اللي بندفعها يا عزة ده حقنا ليه بتستخفي بيه ! طبعا قولتلها حقك عليّ أصل إحنا عندنا مليارات مسروقة راحت و مش راجعة و الحرامية يرتعون فسادا و زيادة سرقة بينا عاااااادي !

شوفت تقريبا لندن بتتحرق و البيوت بتنكسر لمحلات بتتسرق و كنت باتفرج علي الكلام ده علي الهوا في التليفزيون و طلبوا من كاميرون يتصرف و مرضيش أبدا يضرب نار و لا يمس حد و قبض عليهم في ٤٨ ساعة بالقانون و هو ده اللي كان بيقصده بمحدش يسألني عن حقوق الإنسان انه هيقبض عليهم من خلال اللي ظهر في الكاميرات و بعدين يتحقق معاهم وفقا للقانون .

شوفت واحد مصنف إرهابي و وصل بيه البجاحة انه قالك هناخد الملكة سبية و كان بيحرض علي العنف صراحة و مع ذلك واخد حقه كبني آدم و بياخد الرعاية الصحية الطبيعية لأي إنسان حتي لو إرهابي و قعدوا سنين مش عارفين يرحلوه أحسن يتعذب في البلد اللي طالباه !

شوفت و شوفت اللي حسرني علي بلدي و أهل بلدي فاتمنيت أشوف و لو ربع ده بيتحقق لأهلي و إزددت غلا و غضبا علي نظام قذر بدل من أن يكون في خدمة الشعب سخر الشعب لخدمته و إستباح إنسانيته و حقه في الحياة !!!!!

و في النهاية شوفت عجب العجاب من مُسمي ( مصريين ) و مُسمي ( بشر ) بيتمتعوا بكل اللي قولته ده في بلد إحتوتهم بعد أن لفظتهم بلدهم فمارسوا معني الحرية و العيش و العدالة الإجتماعية و الكرامة الإنسانية و إستخسروا كل ده في بلدهم و أهل بلدهم و أيدوا عصابة ظالمة قاتلة هي السبب في خروجهم من بلدهم أصلا !!!

علشان كده هافضل أقولها بأعلي صوت ‫#‏الثورة_مستمرة‬ ياااااا بلدي يااااااا ‫#‏مصر‬